ရေဖြူမြို့နယ်မှာရှိတဲ့ ကရင်လူမျိုးအများစုနေထိုင်ကြတဲ့ ရွာကလေးတရွာရဲ့ ဝတ်ပြုရာ ဘုရားကျောင်းတဆောင်ပါ။ ဘုရားကျောင်းပုံစံအရ ရှေးလက်ရာတခုလို့ ခန့်မှန်းရပါတယ်။

ထူးခြားချက်လေးကတော့ နေရာအတော်များများမှာ မြင်ရလေ့ရှိတဲ့ ဘုရားကျောင်းတွေရဲ့ တည်ဆောက်ထားဟန် နဲ့ ကွဲလွဲနေတာပါ။ မြန်မာပြည်က ဗုဒ္ဓဘာသာ ဘုန်းကြီးကျောင်းတွေမှာ မြင်ရလေ့ရဲ့ မြန်မာမှုဗိသုကာဟန် နဲ့ ပေါင်းစပ်ပြီး ဒီသစ်သားကျောင်းတော်ကြီးကို တည်ဆောက်ခဲ့ကြဟန်တူပါတယ်။

တနင်္သာရီတိုင်းမှာ ဗုဒ္ဓဘာသာများသာမက အခြားသော ဘာသာဝင်များစွာရှိပြီး အချင်းချင်း သဟဇာတ ရှိစွာနေထိုင်လာခဲ့ကြပါတယ်။

စာရေးသူအနေနဲ့ကတော့ ဒီဘုရားကျောင်းဆောင်ကြီးကို ဘယ်သူတွေ ဒီဇိုင်းဆွဲပြီး ဆုံးဖြတ်တည်ဆောက်ခဲ့ကြသလဲ။ ဘယ်ခုနှစ်ကလဲ။ ဘာလို့ဒီလို ဒီဇိုင်းပုံစံ လက်ရာဟန်ထွက်လာသလဲ ဆိုတာကို စိတ်ဝင်စားလှပါတယ်။ ပြီးတော့ ဒီဘုရားကျောင်းကြီးကို အခုထိရှိသေးလားဆိုတာကိုလဲ စိတ်ဝင်စားနေမိပါတယ်။

ဒီပုံက ကိုဗစ်မဖြစ်ခင် နှစ်က ရိုက်ယူထားခဲ့တာမို့ အခုဆို ၅ နှစ်လောက်ရှိနေခဲ့ပါပြီ။ ပုံထဲမှာတော့ ဒီဘုရားကျောင်းကြီးကိုတော့ ရွာသူရွာသားတွေက အသုံးပြုဆဲ ထိန်းသိမ်းထားဆဲဆိုတာ မြင်တွေ့ခဲ့ရပါတယ်။ လျှပ်တပြက် အမှတ်မထင်ပါပဲ ဒီဘုရားကျောင်းကြီးကိုတွေ့လို့ အပြင်ကနေပဲ ဓာတ်ပုံ တပုံပဲ ရိုက်ခဲ့ရပါတယ်။

ဒီလိုမျိုးထူးခြားတဲ့ သာသနိကအဆောက်အအုံတွေ တနင်္သာရီမှာ ရှိဦးမယ်လို့ မျှော်လင့်ရပါတယ်။